Дьокуускайга эр киһи атаһын саанан ытта

Бэҕэһээ, атырдьах ыйын 6 күнүгэр Дьокуускай куоракка 54 саастаах эр киһи атаһын саанан ытта. Бу туһунан Россия ис дьыалаҕа министиэристибэтин өрөспүүбүлүкэтээҕи салаатын пресс-сулууспата иһитиннэрэр.

Полицияҕа Маҕанныыр суол ахсыс килэмиэтиригэр баар даачаларга саас тыаһа иһиллэрин туһунан иһитиннэрии киирбит. Быһылаан миэстэтигэр тута патрульнай пост сулууспата ыытыллыбыт.

Биир даача хаһаайына атаһын уонна ол киһилиин олорор дьахтардыын арыгы иһэ сылдьыбыта биллибит. Бэйэлэрин икки ардыларыгар охсуһууга тиийбит иирсээн тахсыбыт.

«Иирсээн кэмигэр дьиэ хаһаайына бэйэтин саатын ылан бастаан салгыҥҥа, онтон ыалдьыт атаҕар ыппыт. Ол кэннэ сэсиэттэрэ суһал көмөнү ыҥырбыттар», — диэн этиллэр.

Өттүгэр ытыллыылаах эр киһи балыыһаҕа киллэрилиннэ.

Полиция үлэһиттэрэ саанан ыппыт эр киһини туттулар. Дьиэтин көрүү кэмигэр кини аатыгар сурулла сылдьар 12 калибрдаах саа уонна икки ботуруон гильзата тутулунна. Быһылаан чахчытынан процессуальнай бэрэбиэркэ ыытыллар.