Дьокуускайга эстрада тыйаатырын саҥа дьиэтэ аһыллыаҕа

Эстрада судаарыстыбаннай тыйаатыра үлэтин саҥа дьиэҕэ саҕалыа. Бу туһунан СӨ баһылыгын уонна бырабыыталыстыбатын пресс-сулууспата иһитиннэрдэ.

Алтынньы 5 күнүгэр 12.00 чаастан 107 миэстэлээх камернай сааланы көрдөрүөхтэрэ. Тыйаатыр саҥа дьиэтигэр экскурсия ыытыахтара, ону таһынан «Чудный костюм» диэн мюзикл премьерата буолуоҕа.

Эстрада тыйаатыра түөрт саалалаах: камернай саала, тыыннаах доҕуһуол кэнсиэрдэригэр анаан аччыгый акустическай саала, «Голубой огонек» быһыытынан ыытыллар тэрээһиннэргэ уонна кыра кэнсиэрдэргэ икки муусука хоһо баар.

Үс кыра сааланы номнуо репетиция ыытарга туһана сылдьаллар. Инникитин тыйаатырга түмэл тэрийэр былааннаахтар.

Тыйаатыр саҥа аадырыһа — Ленин проспегын, 47-с дьиэтэ. Бу иннинэ манна сынньалаҥ киинэ турбута.