Дьокуускайга гемодиализка сылдьар дьону таһыыга 10,6 мөлүйүөн солкуобай көрүлүннэ

Дьокуускай куоракка бүөр ыарахан ыарыытынан ыалдьар дьону тиэйиигэ эбии 10,6 мөлүйүөн солкуобайтан тахса суума көрүлүннэ. Бу туһунан СӨ борокуратууратын пресс-сулууспата иһитиннэрэр.

Инники ыарыһахтары тиэйиинэн дьарыктана сылдьыбыт урбаанньыт төлөбүр оҥоһуллубат буолбутуттан сылтаан, 2019 сыл сэтинньи 25 күнүттэн өҥөнү оҥоруутун тохтоппут.

«2019 сылга гемодиализка сылдьар дьону олорор сирдэриттэн диализ оҥоһуллар сиригэр диэри уонна төттөрү таһыыга тырааныспарынан хааччыйыыга бүддьүөттэн эбии үп көрүллүбэтэх», — диэн этиллэр.

«Якутскмедтранс» хампаанньа хас да төгүл министиэристибэ аатыгар эбии үбүлээһин ирдэнэрин туһунан суруйа сылдьыбыт даҕаны, сөптөөх миэрэ ылыллыбатах.

«2019 сыл ахсынньытыгар урбаанньыт өҥө оҥоруутун тохтоппутун эрэ кэннэ, эбии 10 мөлүйүөн 609 тыһыынча солкуобай суума тырааныспарынан хааччыйыыга көрүллүбүт», — диэн пресс-сулууспа бэлиэтиир.

Кэһиини туоратыыга уонна сэрэтиигэ өрөспүүбүлүкэ бырабыыталыстыбатыгар СӨ борокуратууратын анал хонтуруолугар сылдьар представление түһэрилиннэ.