Дьокуускайга иккис күнүн салгын ПДК-тын үрдээһинэ бэлиэтэнэр

Роспотребнадзор өрөспүүбүлүкэтээҕи салаата Дьокуускай салгыныгар эбиискэ кыырпахтар концентрациялара нуорматтан үрдээһинин хаттаан бэлиэтээтэ. Бу туһунан биэдэмистибэ пресс-сулууспата иһитиннэрэр.

«Атырдьах ыйын 5 күнүгэр сарсыарда 09.00 чааска Дьокуускай куоракка салгын эбиискэ кыырпахтарын кээмэйэ сөптөөх концентрацияны (0,3 мг/м3) аһары барыыта бэлиэтэннэ, РМ фракция ыйааһыннаммыт эбиискэлэрин көрдөрүүтэ 10 – 0,44 мг/м3 тэҥнэстэ», — диэн этиллэр.

Углерод оксидын, азот оксидын уонна диоксидын концентрациялара муҥутуур көрдөрүүлэри куоһарбатылар.

Бэҕэһээ, атырдьах ыйын 4 күнүгэр эмиэ исписэлиистэр салгын ПДК-тын куоһарыытын бэлиэтээбиттэрэ. Киин куорат салгынын киртийиитэ бара турар ойуур баһаардарын буруота сабардааһынынан сибэстээх.