Дьокуускайга инновационнай механизмынан үөрэтэр «Оҕо саас академията» аһылынна

Өрөспүүбүлүкэ киинигэр Тамара Комарова аатынан «Оҕо саас академията» 18-с №-дээх «Прометейчик» оҕо уһуйааныгар үлэтин саҕалаата. Бу туһунан Үүнэр көлүөнэ пуондатын пресс-сулууспата иһитиннэрэр.

Академияҕа кластернай үөрэтиигэ олоҕурбут инновационнай механизмынан үөрэтиини туһаныахтара.

«Оҕо саас академията үөрэҕирии саҥа ирдэбиллэригэр, бастыҥ мировой кадрдарга, уопсастыбаннай наукаларга олоҕуран үлэлиэҕэ. Өрөспүүбүлүкэҕэ үөрэҕирии бэйэтэ туспа төрүт үгэстэргэ олоҕурар суоллаах-иистээх», — диэтэ РФ Уопсастыбаннай палаататын, Россияҕа информационнай уопсастыба сайдыытын бөлөҕүн чилиэнэ Ирина Комарова.

Үүнэр көлүөнэ пуондатын генеральнай дириэктэрэ Владимир Егоров этэринэн, өрөспүүбүлүкэ бары оҕолоро табыгастаахтык сайдар кыахтаныахтара.

«Оҕо саас академиятыгар» оскуола иннинээҕи саастаах оҕолору бүттүүн художественнай-эстетическэй иитии систиэмэтин айаааччы, сэбиэскэй кэм уонна Россия педагога Тамара Комарова аата иҥэрилиннэ.

Кини салайыытынан, Үөрэҕирии уонна наука министиэристибэтэ бигэргэппит, оҕо уһуйааныгар иитии, үөрэтии инновационнай бырагыраамата оҥоһуллубута. Салгыы «Төрүөҕүттэн оскуолаҕа диэри. Оскуола иннинээҕи үөрэтии сүрүн бырагыраамата» буолан тахсыбыта. Билиҥҥи туругунан, бу бырагырааманан Россия оҕо уһуйааннарын 78% үлэлиир.