Дьокуускайга IX «Боотурдар оонньуулара» буолан ааста

Дьокуускайга IX төгүлүн киин куорат устудьуоннарын икки ардыларыгар саха төрүт спорт көрүҥнэригэр «Боотурдар оонньуулара» буолан ааста.

2015 сыллаахха ууга тимирэн эрэр оҕону быһаары олохтон туораабыт Алексей Никифоров хорсун быһыыта умнуллубат. Үтүө аата күн бүгүҥҥэ диэри ааттанар. Кини биллэр спортсмен буоларын таһынан, «Боотурдар оонньууларын» тэрийсибит дьоннортон биирдэстэрэ. Доҕотторо, атастара, бу күрэхтэһиини кини сырдык кэриэһигэр анаан төрдүс сылын тэрийэллэр.

Быйылгы күрэхтэһиигэ 14 араас улуус бэйэтин дуулаҕа күүстээх, быыппастар былчыҥнаах устудьуоннарын анаан-минээн сүүмэрдээн хамаанда тэрийэн кытта кэлбит. Кинилэр аҕыс саха төрүт спорт көрүҥнэригэр биирдиилээн уонна хамаанданан бастыыр иһин күрэхтэстилэр.

Былырыыҥҥы турнир кыайыылахтара — Уус Алданнар, бу да сырыыга иннилэрин биэрбэтилэр, күрэх түмүгүнэн бастакы миэстэ буоллулар. Кэбээйилэр бэрт чугас иһэннэр иккистээтилэр, онтон Бүлүү улууһун спортсменнара үһүс буоллулар.