Дьокуускайга «Мамонтенок» цирк искусствотын бэстибээлэ саҕаланна

Марфа уонна Сергей Расторгуевтар ааттарынан Саха сирин судаарыстыбаннай циркэтин 25 сыллаах үбүлүөйүгэр ананар, үгэс буолбут аан дойдутааҕы «Мамонтенок» цирк искусствотын бэстибээлэ Дьокуускайга бүгүн саҕаланар.

Бэстибээл устата Саха циркэтигэр Армения, Вьетнам, Израиль, Казахстан, онтон да атын уопсайа 12 дойду артыыстара бастыҥ нүөмэрдэрин көрдөрүөхтэрэ.

«Жонглердааһыҥҥа, эквилибристикаҕа, ханаатынан хаамыыга, гимнастикаҕа, клоунадаҕа күрэхтэһиэхтэрэ. Артыыстар соҕотохтуу, иккилии уонна бөлөҕүнэн кытталлар, бырагыраамаҕа 30-ча нүөмэр киирдэ», — диэн бүгүн ыытыллыбыт пресс-конференцияҕа иһитиннэрдилэр.

Урут 18-гар эрэ диэри саастаах эдэр дьон кыттар буоллахтарына, быйыл сааһынан хааччахтааһын суох диэн бэлиэтэнэр.

Бэстибээл чэрчитинэн Арктикаҕа национальнай цирк искусствотын сайдыытыгар анаммыт форум бүгүн ыытыллар.