Дьокуускайга массыына остуолбаҕа саайылынна

НВК САХА — Балаҕан ыйын 11 күнүгэр Дьокуускайга Дзержинскэй уонна Строителей уулуссалар быһа охсуһууларыгар иномарка массыына суол остуолбатын түҥнэри көттө уонна түҥнэһиннэ. Бу туһунан Суолга куттал суох буолуутун судаарыстыбаннай инспекцията иһитиннэрдэ.

««Toyota Crown» массыына 1992 сыллаах төрүөх суоппара, массыынаны ыытыы хааччахтанар түргэнин тутуспакка, суол кытыытыгар тахсыбыт, ол кэннэ суол бэлиэлэрэ уонна суол быраабылатын кэһиини устар камералар ыйанан турбут остуолбаларын түҥнэри көтөн баран түҥнэстибит», — диэн этиллэр.

Саахал түмүгэр светофор иннигэр тротуарга суолу сатыы туораары турбут сокуоннай сааһын ситэ илик оҕо эчэйбит. Суоппар уонна массыына иһигэр олорсон испит пассажир эмсэҕэлээбэтэхтэр.

Саахал тахсыбыт сиригэр өрөмүөн үлэтэ ыытыллар.