Дьокуускайга «Росгеология» кыттыылаах геология чинчийиитигэр мунньах ыытылынна

Дьокуускайга «Росгеология» кыттыылаах мунньахха Саха сиригэр геология чинчийиитэ сайдар тосхолун ырыттылар.

Тэрээһиҥҥэ былаас федеральнай уорганнарын, өрөспүүбүлүкэ министиэристибэлэрин салайааччылара, Саха сиригэр сир баайын туһанар бөдөҥ тэрилтэлэр муһуннулар.

«Саха сиригэр бу салаа сайдар кыаҕа улахан, ол ньиэби, гааһы эрэ кытта ситимнээх буолбакка, сиртэн хостонор баай бары көрүҥэр: алмааска, кыһыл көмүскэ, үрүҥ көмүскэ, чоххо, тимир рудаҕа о.д.а. эмиэ сыһыаннаах», — диэн «Росгеология» АУо бырабылыанньатын бэрэссэдээтэлэ Сергей Горьков иһитиннэрдэ.

«Росгеология» Саха сиригэр 23 эбийиэккэ үлэлиир диэн бэлиэтээтилэр, ол курдук 15 эбийиэккэ сиртэн хостонор кытаанах баайы хостуур, аҕыска — ньиэби уонна гааһы.

«Өрөспүүбүлүкэҕэ геология чинчийиитигэр үлэ мөлтөх. Бу үлэҕэ экология чааһыгар боппуруостар бааллар. Манна сир баайын туһанааччылары көҕүлүөххэ уонна өйүөххэ наада. Өрөспүүбүлүкэ уонна федеральнай таһымҥа кэккэ харгыстар бааллар, геология чинчийиитэ этэҥҥэ ааһарын туһугар ол харгыстары туоратыахха наада», — диэтэ Ил Дархан Айсен Николаев.

Ил Дархан эппитинэн, өрөспүүбүлүкэ бырабыыталыстыбата «Росгеологияны» кытта тэҥҥэ үлэлэһэригэр уонна сир баайын туһанааччылар кыһалҕаларын быһаарарга бөлөх тэриллибит.