Дьокуускайга саҥа суһал көмө станцията баар буолла

Дьокуускай куорат Курнатовксай уулуссатыгар саҥа суһал медицинскэй көмө станцията тэрилиннэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Ил Дархан Айсен Николаев киин куорат медицинскэй тэрилтэлэринэн сырыытын кэмигэр, саҥа станция үлэһиттэрэ үлэлиир усулуобуйаларын, техническэй хааччыйыытын уонна саҥа суһал көмө массыыналарын көрдө-иһиттэ.

Дьокуускай балыыһалара Россия бырабыыталыстыбатын быһаарытыынан 14 саҥа толору хааччылыылаах массыыналары туттулар.

«Марха, Тулагы уонна Кангаласс олохтоохторо кэмигэр түргэн медицинскэй өҥөнү ылар кыахтаннылар», – диэн Айсен Николаев эттэ.

Дьокуускай куорат хоту өттүн, чуолаан аэропорт оройуонун, Сатал микрооройуон, Марха, Тулагы, Кангаласс бөһүөлэктэр олохтоохторо инники суһал көмө кэлиитигэр ыарахаттары көрсөр этилэр диэн бэлиэтэнэр.