Дьокуускайга салгыны киртитэр эттиктэр бары ирдэнэр нуорманы куоһардылар

Роспотребнадзор өрөспүүбүлүкэтээҕи салаата Дьокуускай куорат салгыныгар баар киртитэр эттиктэр бары көрдөрүүлэринэн ирдэнэр нуорманы аһары барыыларын бэлиэтээтэ. Бу туһунан биэдэмистибэ пресс-сулууспата иһитиннэрэр.

«Балаҕан ыйын 27 күнүгэр 14.00 чаас туругунан Дьокуускай куорат салгыныгар баар углерод оксидын көрдөрүүтэ 5,5 мг/м3 тэҥнэстэ (нуорма 5 мг/м3), азот оксида — 0,4 мг/м3 тэҥнэстэ (нуорма 0,4 мг/м3), азот диоксида — 0,24 мг/м3 тэҥнэстэ (нуорма 0,2 мг/м3), PM2,5 фракция эттиктэрэ — 0,37 мг/м3 тэҥнэстилэр (нуорма 0,16 мг/м3), PM10 фракция эттиктэрэ – 0,69 мг/м3 тэҥнэстилэр (нуорма 0,3 мг/м3)», — диэн этиллэр.

СӨ экологияҕа министиэристибэтин иһитиннэриитинэн, Дьокуускай куораты уонна киин улуустары Аммаҕа уонна Уус Алдаҥҥа бара турар баһаардар буруолара бүрүйдүлэр.

Дьокуускайдааҕы күнү-дьылы кэтээн көрөр сулууспа бэлиэтииринэн, балаҕан ыйын 28 күнүгэр тыал хайысхата соҕурууҥҥуга, онтон арҕаа диэкигэ уларыйара билгэлэнэр. Күн иккис аҥарыгар буруо намтыыра күүтүллэр.