Дьокуускайга суол үлэтэ барыта алтынньы 31 күнүгэр диэри түмүктэниэ

«Куттала суох уонна хаачыстыбалаах айан суоллара» федеральнай бырагырааманан суол үлэтэ Дьокуускайга алтынньы 31 күнүгэр түмүктэниэ.

Бу болдьох туһунан «Куттала суох уонна хаачыстыбалаах айан суоллара» национальнай бырайыагы олоххо киллэрии боппуруостарынан бүгүн, сэрэдэҕэ, СӨ бырабыыталыстыбатын бэрэссэдээтэлин маҥнайгы солбуйааччы Алексей Колодезников мунньаҕар иһитиннэрдилэр.

Киин куоракка Хатыҥ Үрэх суолугар уонна Ларионов уулуссатыгар этиллибит болдьохтон суол үлэтэ хаалар иһэр диэн бу иннинэ иһитиннэриллибитэ.

«Дорисс»бэдэрээттээх тэрилтэ эппитинэн, Хатыҥ Үрэх суолугар асфаллыыр үлэ түмүктэммит.

Оттон Ларионов уулуссатын биир кэрчигэр асфалынан үс бүк бүрүйбүттэр. Бэдэрээтчит «Сахатрансстрой» иһитиннэрбитинэн, алтынньы 18 күнүн диэки Ларионов уулуссатын иккис учаастага асфалланыаҕа.