Дьокуускайга сылгылар ыстараап стоянкалара тэриллиэҕэ

Дьокуускай куоракка көрүүтэ-истиитэ суох сылдьар дьиэ кыылларын тутар анал былаһаакка тэриллэрэ былааннанар. Бу туһунан куорат уокуругун дьаһалтатын пресс-сулууспата иһитиннэрэр.

Тулагы уонна Хатас агро оскуолаларын баазатыгар көрүүтэ-истиитэ суох сылдьар сылгылары ыстараап стоянкаларын тэриллиэн сөп. Бүгүҥҥү күҥҥэ сылгылары тутан ылыы, тиэйии, аһатыы уонна көрүү-истии бэрээдэгэ бэлэмнэнэр.

Билигин тыа хаһаайыстыбатын сирдэрин сылгы иитээччилэргэ мэччирэҥ сирин быһыытынан туһаҕа биэрии бэрээдэгин чэпчэтии боппуруоһа көрүүгэ сылдьар. Быһаарыы ылыллар түгэнигэр, сылгы иитээччилэр тыа хаһаайыстыбатын бородуукуйатын оҥорон таһаарааччылары өйүүр өрөспүүбүлүкэтээҕи бырагыраама чэрчитинэн субсидия ылар кыахтаныахтара.

Онуоха сылгылары көрүү-истии иһин административнай эппиэтинэс күүһүрүөҕэ. Хаһаайыттар сылгыларын сөптөөх усулуобуйанан хааччыйбатахтарына, мэччирэҥ сирдэрэ бэриллиэхтэрэ суоҕа.

Дьокуускайга уонна куорат чугаһыгар 3169 төбө сылгы иитиллэр. 2020 сылга 14 хаһаайыстыба сылгы иитиитин сайыннарыыга субсидия ылбыта этиллэр.