Дьокуускайга түүҥҥү кулууптар, киинэ тыйаатырдара, банкеттыыр саалалар сабылыннылар

Ил Дархан Айсен Николаев Саха сиригэр түүҥҥү кулууптары, киинэ тыйаатырдарын, оҕо оонньуур хосторун уонна банкеттары ыытар саалалар үлэлэрин тохтотор туһунан ыйаахха илии баттаата. Бу туһунан коронавирус тарҕаныытын сэрэтии уонна хонтуруол боппуруостарынан СӨ бырабыыталыстыбатын иһинэн үлэлиир суһал штаб иһитиннэрдэ.

Маны тэҥэ атыы-эргиэн кииннэригэр уонна ырыынактарга баар оҕолору аралдьытар кииннэр уонна уопсастыбаннай аһы-үөлү тэрийэр эбийиэктэр үлэлэрэ ууратылынна.

Рестораннарга, кафеларга, баардарга уонна да атын сирдэргэ кальян тардыы бобулунна.

«Табаардары уонна аһы-үөлү ыраахтан сакаастаан дьиэҕэ тиэрдии эрэһиимигэр көһөр кыаҕы учуоттуурга этилиннэ», — диэн этиллэр.