Дьокуускайга түөрт саастаах оҕо балконтан суулунна

Дьокуускай куоракка түөрт саастаах кыыс оҕо иккис этээстэн суулунна. Бу туһунан Ис дьыала министиэристибэтин өрөспүүбүлүкэтээҕи салаатын пресс-сулууспата иһитиннэрэр.

«Ийэтэ кыыс утуйа сыттаҕына сүүрэ барбыт. Кыыс тылыттан, уһуктан баран мультик холбуу сатаабыт да, кыаллыбатах. Онтон ийэтин ыҥыраары балкоҥҥа тахсыбыт уонна москитнай сетканы арыйан тапталлаах мультфильмын дьоруойун курдук ыстаммыт», — диэн биэдэмистибэ тириэрдэр.

Үрдүктэн сууллуу түмүгэр оҕо араас эт-хаан эчэйиитин ылла, билигин реанимация салаатыгар сытар. Быһылаан тахсыытынан бэрэбиэркэ ыытыллар.