Дьокуускайга тыа сирин дьахталларын семинара ааста

«Тыа сирин кэлим сайдыытын олуга — нэһилиэк бигэ ыала» диэн тыа сирин дьахталларын семинара Дьокуускайга ыытылынна. Тэрээһиҥҥэ дьахталлар сэбиэттэрин уонна фермерскай хаһаайыстыбалар салайааччылара мустан тыа сирэ сайдыытын тула дьүүллэстилэр.

Билиҥҥи туругунан өрөспүүбүлүкэ үрдүнэн 148 дьахтар бааһынай хаһаайыстыба тэрилтэлэригэр салайааччынан үлэлиир. Уопсайа 2204 бааһынай хаһаайыстыба көхтөөх үлэлээҕинэн биллэр.

Фермердар ахсааннара элбииригэр федеральнай бырагыраамалар төһүү күүс буолаллар. 2012 сылтан 171 дьахтар федеральнай граннары ылан хаһаайыстыбаларын кэҥэттилэр. Онуоха тустаах министиэристибэ ыччаты тыа сиригэр көҕүлүүр саҥа механизмнары толкуйдуур.

Семинар чэрчитинэн «Тыа хаһаайыстыбатын бастыҥ салайааччы дьахталлара» кинигэ иккис чааһын сүрэхтээтилэр. Маны тэҥэ, мунньах кыттыылаахтара тымныы усулуобуйаҕа үүнээйини үннэрии , иис-уус кистэлэҥнэрин үллэстэр маастар кылаастары ыыттылар, быыстапка-дьаарбаҥка тэрилиннэ. Тэрээһин бастыҥнарга наҕараада туттарыынан түмүктэннэ.