Дьокуускайга уулуссаҕа дьахтартан ытарҕатын уордулар

Дьокуускай куорат олохтооҕо ювелирнай оҥоһуктары уорууга уорбаланар. Бу туһунан өрөспүүбүлүкэтээҕи ис дьыала министиэристибэтин пресс-сулууспата иһитиннэрэр.

«Дьахтар уулуссанан баран истэҕинэ итирик эр киһи саба түспүт. Күүһүнэн ытарҕатын былдьаан баран куоппут. Эмсэҕэлээччи хоромньутун 10 000 солкуобайынан сыаналаата», — диэн биэдэмистибэ бэлиэтиир.

Оперативниктар буруйдааҕы тута туттулар. 32-саастаах инники холуобунай эппиэтинэскэ тардылла сылдьыбыт киин куорат олохтооҕо буолара быһаарылынна.

Буруйдаах этэринэн, уорбут ытарҕатын тута харчыга батарбыт. Ылбыт харчытынан аһыы утах атыыласпыт. Быһылаан чахчытынан холуобунай дьыала тэрилиннэ.