Дьокуускайга уус-уран гимнастикаҕа чөмпүйэнээт түмүктэннэ

Ахсынньы 1 күнүгэр Дьокуускайга уус-уран гимнастикаҕа биирдиилээн бастыыр иһин уонна өрөспүүбүлүкэ чөмпүйэнээтэ түмүктэннэ диэн «Якутия 24» телеханаал иһитиннэрэр.

Чөмпүйэнээт кыайыылаахтара эрэгийиэн сүүмэрдэммит хамаандатыгар киирэн, аны Уһук Илин күрэхтэһиитигэр кыттыахтара. Маны таһынан, судьуйалар кэллиэгийэлэрэ 2020 сылга ыытыллыахтаах Х Арассыыйа үөрэнээччилэрин сайыҥҥы спартакиадаларын иккис түһүмэҕэр кыттааччылары талла.

Күрэхтэһии сүрүн судьуйата, Арассыыйа үтүөлээх тириэньэрэ, норуоттар икки ардыларынааҕы категориялаах судуьуйа Татьяна Грибкова Саха сирин спортсменнарын маастарыстыбаларын таһыма сыллата үрдээн иһэрин бэлиэтээтэ.

«Ааспыт сылларга күүстээх үлэ ыытыллан, билигин Уһук Илиҥҥи күрэхтэһиитигэр хамаанданы таллыбыт. Бу күрэхтэһии Саха сиригэр кэскиллээх гимнасткалар баалларын көрдөрдө. Кинилэр таһымнарын өссө үрдэтэ туралларыгар, Арассыыйа күрэхтэһиилэригэр ааттарын ааттатыахтарын баҕарабын. Уһук Илин күрэхтэһиитигэр Саха сирин хамаандата бастыҥнар истэригэр киирэр кыахтаах», — диир Татьяна Грибкова.

Өрөспүүбүлүкэтээҕи күрэхтэһиигэ Дьокуускайтан, Мирнэйтэн уонна Нерюнгриттэн 163 спортсмен кыттыыны ылла.