Дьокуускайга, Жатайга, Нерюнгригэ уонна Мииринэйгэ арыгы атыыта хааччахтанна

Кулун тутар 31 күнүттэн муус устар 6 күнүгэр диэри Дьокуускайга, Жатайга, Нерюнгригэ уонна Мииринэйгэ арыгы атыыта хааччахтанна. Бу туһунан Ил Дархан Айсен Николаев өрөспүүбүлүкэҕэ коронавирустан олохтоммут эмидемиологическэй туругунан олохтоохторго иһитиннэриитин кэмигэр эттэ.

«Урбаанньыттар хааччахтааһын ирдэбилин кэспэккэ, эппиэтинэстэрин көрдөрөллөрө ирдэнэр. Саха сирин олохтоохторун доруобуйатын уонна олоҕун харыстааһын боппуруоһа тыҥаан турар кэмигэр, барыыс туһунан саныыр бириэмэ буолбатах. Алын бизнес тэрилтэлэригэр хайаан да өйөбүл оҥоһуллуоҕа, ол иннинэ коронаируһу кыайыахпытын наада. Билигин сүрүн уонна соҕотох суолталаах боппуруоһунан — дьон доруобуйата буолар!», — диэн Айсен Николаев тоһоҕолоото.

Маннык кытаанах миэрэлэр вирус тарҕаныытын тохтотор сыалтан ыытыллалларын Ил Дархан быһаарда. Быраабылалары тутуһуу уопсастыба түмсүүтүн уонна өрөспүүбүлүкэ хас биирдии олохтооҕун эппиэтинэһин көрдөрөрүн бэлиэтээтэ.

«Бу ыарыы аҕам саастаах дьону харыстаабат, атын да ыалдьыбыттарга улахан охсуулаах. Биһиги бары бииргэ түмсэн, бу ыарыыны билигин тохтотуохтаахпыт, салгыы тарҕаныытын таһаарыа суохтаахпыт. Күндү Сахам сирин олохтоохторо! Бары күүстээх уонна эппиэтинэстээх буолуоххайын, бэйэ бэйэбитин өйүөххэйин! Бииргэ түмсүүлээх эрэ буоллахпытына тулуһуохпут уонна кыайыахпыт!», — диэн Айсен Николаев түмүктээтэ.