Доруобуйа харыстабылын министиэристибэтэ COVID-19 ыарыһахтары эмтэһини быһаарда

СӨ доруобуйа харыстабылын министиэристибэтэ коронавирустаах ыарыһахтар ханнык түгэҥҥэ балыыһаҕа киирэллэрин туһунан быһаарыы биэрдэ. Бу туһунан биэдэмистибэ пресс-сулууспата иһитиннэрэр.

«Коронавирус инфекцията бигэргэннэҕинэ, Роспотребнадзор территориальнай уорганын уурааҕынан, ыарыһаҕы икки нэдиэлэ устата медицинскэй кэтээн көрүү олохтонор. Клиническэй бэлиэлэр суох буоллахтарына вирус аналиһа 8-10-с күҥҥэ хос ылыллар, ОРВИ сибикитэ бэлиэтэнэр түгэнигэр анализ ол күн тутта ылыллар», — диэн этиллэр.

Ыалдьыбыт киһини кытта ыкса сибээскэстээх гражданнарга ыйыы суруллар: бииргэ олорор, биир кэбиниэккэ үлэлиир.

Статистика көрдөрөрүнэн, COVID-19 инфекциялаах дьон 60 %-на вируһу сибикитэ суох аһардар, 30 %-на чэпчэкитик аһардар, кинилэр тастан эмтэнэллэр, 10 %-на ыарыыны орто ыараханнык уонна ыараханнык аһардар.

Стационарнай эмтэнии маннык категорияларга ыарыһахтарга көрүллэр: орто степеннээх пневмониялаах (25-30 %-н), ыарахан степеннээх пневмониялаах (10-15 %-н). Коронавирус инфекциятыттан сылтаан пнеманиялаабыт ыарыһахтары балыыһаҕа киллэриии Россия доруобуйа харыстабылын министиэристибэтин көрдөрүүлэринэн ыытыллар.

Стационарнай усулуобуйаҕа медицинскэй өҥөнү оҥорор сыалтан Дьокуускайга алта биэдэмистибэннэй эбийиэк хайысхата уларытыллыбыта бэлиэтэнэр. Медицинскэй хайысхата суох эбийиэктэргэ быстах кэмҥэ стационардар тэриллибиттэрэ: уопсайа 1629 миэстэлээх инфекционнай салаа, олортон 333-һэ кислород тиэрдиилээх, 177-тэ тыҥаны үлэлэтэр аппаратынан хааччыллыылаах.

Инфекционнай ыарыһахтары сытыарарга биир кэмҥэ тэҥҥэ тэрииллибит миэстэ муҥутуур элбэх ахсаана 1776 тэҥнэһэр.