Эбээн Бытантайга 42 туонна оту тиксэрдилэр

Эбээн Бытантай Кустуур сэлиэнньэтигэр Ньурба улууһуттан 42 туонна сүөһү сиир отун тиксэрдилэр. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

Кэлбит от 172 төбө саха сүөһүлээх, ол иһигэр 87 ыанар ынахтаах Анна Слепцова хаһаайыстыбатыгар ананар.

Улуустааҕы тыа хаһаайыстыбатын управлениетын салайааччыта Сергей Аликов бэлиэтииринэн хаачыстыбалаах сүөһү кыстыыр аһылыга суох буолан, хаһаайыстыба отун Ньурбаттан уонна Дьокуускайтан аҕаларга күһэллибит.

«Хаһаайыстыбаҕа быйыл барыта 150 туонна от тиийбэт. Хаалбыт 58 туоннаны Ньурбаттан аҕалыахтара, өссө 50 туоннаны Дьокуускайтан. Бу күннэргэ Түгэһиир нэһилиэгин хаһаайыстыбаларыгар Чурапчы 2-с Харбалааҕыттан эбии 60 туонна кэлиэхтээх» — диэн Сергей Аликов кэпсээтэ.

Ону таһынан «Саха сүөһүтэ» хааһына генофонднай тэрилтэтигэр Чурапчыттан уонна Дьокуускайтан 45 туонна оту, 34 туонна гранулированнай оту, 20 туонна комбикорму, икки туонна эбиэһи, биир туонна кормовой уонна минеральнай уоҕурдууну аҕалыахтара.

Сотору кэминэн улуус киинигэр олоохтоохтор сайаапкаларынан куурусса аһылыгар диэн 22 туонна комбикорм, эбиэс уонна туораах бурдугу аҕалан оҥорон таһаарааччы сыанатынан атыылыахтара. Тырааныспар ороскуотун улуус дьаһалтата уйунар.