Эдэр блогер Карина Колесова искэҥ ыарыытын кыайда

Instagram ситимҥэ «Хаан рактаах подросток олоҕо» блогунан Саха сиригэр киэҥник биллибит 12-саастаах Карина Колесова ыарыыны кыайбытын туһунан иһитиннэрдэ.

Искэҥ ыарыытын утары охсуһуу туһунан блогун Карина ийэтин Натальяны кытта ыытар. Иккис сылын ааҕааччыларыгар хайдах эмтэнэрин туһунан кэпсиир уонна араас аралдьытар видеолары таһаарар.

Нэдиэлэ анараа өттүгэр хаттаан бэрэбиэркэлээһини баран саҕалаабыт уонна бэҕэһээ, атырдьах ыйын 10 күнүгэр ыарыыта ремиссиялаабытын туһунан иһитиннэрбиттэр.

«Маннык туругу хас биирдии киһи билбэт, мин курдук искэҥ ыарыытын кыайбыт эрэ дьон. Икки сыл устата ыарыыны кытта охсуһан баран кыайыыны ситиһии — киһи сатаан тириэрдибэт туруга. Биллэн турар, доруобуйабын хайаан да харыстыахтаахпын, маннык ыарыы хайа баҕарар киһиэхэ төннүөн сөп. Үс ый буола-буола хаттаан чинчийиини ааһар буолабын. Киэһэ чугас дьоммутун бырааһынньыктааҕы остуолга күүтэбит, Мин өссө атын былааннардаахпын, олор тустарынан бэйэм @karishka.k.08 аккауммар кэпсиэҕим», – диэн Карина санаатын үллэһиннэ.

Кини быйыл үс сыл иһигэр бастакытын оскуолаҕа барар, бу кэм устата дьиэтиттэн үөрэммитэ.

Билигин кини блогун 64 тыһыынчаттан тахса киһи ааҕар. Ыарыыны кыайбытын туһунан видеота түөрт тыһыынчаттан тахса эҕэрэ тыллаах комментарийы ылла.