«Эдэр табаһыт» бырагыраама бары улууска тоҕоостоох буолла

Эдэр табаһыттарга олорор усулуобуйаларын тупсаралларыгар биир мөлүйүөн солкуобай ылар кыах биэрэр «Эдэр табаһыт» бырагыраама Саха сирин бары улуустарыгар тоҕоостоох буолла. Бу туһунан ТАСС иһитиннэрэр.

Инники бырагыраамаҕа Арктика улуустарын табаһыттара эрэ кыттыыны ылар кыахтаахтара, аны өрөспүүбүлүкэ бары муниципальнай тэриллиилэрэ хабыллар буоллулар.

«Саха сирин бырабыыталыстыбата эдэр табаһыттар дьиэ тутталларыгар эбэтэр атыылаһалларыгар көмө төлөбүрү оҥоруу туһунан докумуоҥҥа уларытыылары киллэрдэ. Социальнай төлөбүрү оҥоруу усулуобуйата уонна бэрээдэгэ уларыйда», — диэн этиллэр.

Тустаах бырагырааманы олоххо киллэриигэ 2020 сылга өрөспүүбүлүкэ бүддьүөтүттэн 11 мөлүйүөн солкуобай көрүллүбүт. Биир кэмнээх социальнай төлөбүргэ 35 саастарын туола илик, түөрт сылтан итэҕэһэ суох хотугу дьиэ табатын иитиинэн дьарыктанар дьон тиксэллэр. Ону таһынан субсидия ылааччы бу хайысхаҕа өссө биэстэн кырата суох сыл үлэлиэхтээх.

Уопсайа 17 сайаапка киирбитэ этиллэр. Олортон түмүгэр Анаабыр, Булуҥ, Үөһээ Халыма, Эдьигээн, Аллараа Халыма, Усуйаана уонна Эбээн Бытантай улуустарыттан 11 табаһыт куонкуруһу ааспыт.