Үөһээ Бүлүү библиотеката 100 кинигэҕэ сертификат тутта

Ил Дархан Айсен Николаев Үөһээ Бүлүү улууһугар командировкатын кэмигэр киин библиотекаҕа сырытта. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Мин бэйэм кыра эрдэхпиттэн Үөһээ Бүлүү киин библиотекатын ааҕааччыта буолабын. Элбэхтэ манна сылдьыбытым, хас да уонунан сыллар кэннилэриттэн төрөөбүт библиотекабар сылдьарым ордук долгутуулаах», — диэн Ил Дархан эттэ.

Өрөспүүбүлүкэ баһылыга «Дарите книги с любовью» бүтүн Россиятааҕы аахсыйа чэрчитинэн улуус бибилиотекатыгар Кыайыы 75 сылыгар тахсыбыт Аҕа дойду Улуу сэриитин туһунан биэс туомнаах кинигэни уонна 100 кинигэни атыылаһарга сертификаты бэлэхтээтэ.

Үөһээ Бүлүү улууһун киин библиотеката 1936 сыллаахха 300 кинигэ пуондалаах үлэтин саҕалаабыт. Бүгүҥҥү күҥҥэ библиотека пуондата 51 тыһыынчаттан тахса кинигэлээх. Улуус 24 нэһилиэнньэлээх пуунугар 21 филиаллаах.