Үөһээ Бүлүүгэ маҥнайгы муниципальнай баһаарынай сулууспа тэрилиннэ

Бүгүн, ахсынньы 3 күнүгэр Үөһээ Бүлүү улууһугар өрөспүүбүлүкэ үрдүнэн маҥнайгы муниципальнай баһаарынай-быыһыыр сулууспа үлэтин саҕалаата. Бу туһунан нэһилиэнньэ олоҕор-дьаһаҕар куттал суох буолуутун хаачыйар өрөспүүбүлүкэтээҕи судаарыстыбаннай кэмитиэт пресс-сулууспата иһитиннэрэр.

«Үөһээ Бүлүү улууһун дьаһалтатын өйөбүлүнэн Кэнтик, Оҥхой уонна Кырыкый нэһилиэктэригэр бэйэ баҕа өттүнэн тэриллибит хамаандалар баазаларыгар чаастардаах, ханнык баҕарар ыксаллаах быһыыга-майгыга көмөҕө кэлэр муниципальнай баһаарынай-быыһыыр сулууспа тэрилиннэ» — диэн кэмитиэт бэрэссэдээтэлэ Дмитрий Лепчиков эттэ.

Россия ыксаллаах быһыыга-майгыга министиэристибэтин сүрүннүүр управлениета саҥа чааска икки баһаарынай массыынаҕа уонна баһаарынайдар таҥастарын комплектарыгар сертификаттары бэлэхтээтэ.

«Саҥа чаас баһаары умуруорууга лицензиялаах уонна уот тахсыытын сэрэтэр дьаһаллары ыытар бырааптаах. Улуус олохтоохторо аны бэйэлэригэр эрэллээхтэр, аттыларыгар күнүстэри-түүннэри уоту утары охсуһууга кэлэргэ бэлэм идэлээх баһаарынайдар баар буоллулар», — диэн ЫБММ өрөспүүбүлүкэтээҕи управлениетын начальнига Павел Гарин эттэ.

Үөһээ Бүлүү улууһа Ил Дархан Айсен Николаев ыйааҕынан бигэргэммит Саха сиригэр баһаартан куттал суох буолуутун концепциятын иитинэн, муниципальнай баһаарынай-быыһыыр сулууспа үлэтин тэрийиигэ пилотнай бырайыак буолар.