Үөһээ Бүлүү оскуолатыгар медицина кылааһа аһылынна

Үөһээ Бүлүү улууһун Марк Егоров аатынан 2 №-дээх айылҕаҕа сыһыаннаах наукаларга хайысхалаах орто оскуолатыгар, 2019 сыл ыам ыйыгар улуус дьаһалтатын уонна киин балыыһаны кытта түһэриспит сөбүлэһиинэн, быйылгы үөрэх дьылыгар медицина кылааһа аһылынна. Бу анал идэ ылыан баҕалаах үөрэнээччилэри уонна улуус киин балыыһатыгар каадыры бэлэмнииргэ төһүү күүс буолуоҕа.

Бу кылаас үөрэнэр былаана атын кылаастартан ураты. Ол курдук кинилэргэ химия уонна биология уруоктара нэдиэлэҕэ биэстии чаас буолаллар. Ону тэҥэ физика оннугар биофизиканы үөрэтэллэр. Маныаха киин балыыһа быраастара нэдиэлэҕэ түөртэ кэлэн, оҕолорго практическай дьарыктары ыыталлар.

Ахсыс кылаастан саҕалаан инникитин быраас идэтин баһылыан баҕарар 20 оҕо үөрэнэ сылдьар. Үөрэнээччилэр күн иккис аҥаарыгар анал куурустарга сылдьаллар, холобур: латинскай тыл, анатомия, химическэй анализ уо.д.а. Каникул кэмигэр оҕолор ХИФУ медицина үнүстүүтүн иһинэн үлэлиир аччыгый медицинскэй академияҕа баран, эбии билии ылыахтара.

«Айылҕаҕа сыһыаннаах наукаларга хайысхалаах оскуола буоларбыт быһыытынан, химия уонна биология хайысхаларыгар хааччыйыыбыт үчүгэй. Оскуола бу хайысхалары тэрийэргэ кыһаллар. Ону таһынан медицина кылааһын тэрийэргэ улуус көрдөһүүтүнэн анал сайаапка түһэрбиппит», — диэн оскуола дириэктэрэ Алексей Федоров кэпсээтэ.