Экология министиэристибэтэ көмүс хостуур «Титан Автотрейд» тэрилтэ үлэтин тус хонтуруолугар ылла

Иенгра бөһүөлэк олохтоохторуттан үҥсүү киирэн, Волковскай үрүйэҕэ көмүс хостооһуну ыытар «Титан Автотрейд» хампаанньа үлэтин СӨ экологияҕа министиэристибэтэ тус хонтуруолугар ылла. Бу туһунан министиэристибэ пресс-сулууспата иһитиннэрэр.

Бу сыл сэтинньи ыйыгар Нерюнгри оройуонун Иенгра нэһилиэгин олохтоохторо, үрүйэ чугаһыгар көмүс хостооһунун ыытыыны утарар миитиҥҥэ тахсыбыттара бэлиэтэнэр.

Көмүс хостуур артыал бүтүн нэһилиэги ууннан хааччыйар скважинаттан чугас үлэлиирэ олохтоохтору долгутар.

«Уулаах сирдэргэ экологическай кэтэбил үлэтэ олохтоохтук ыытыллыа»,- диэн миниистир Сахамин Афанасьев иһитиннэрдэ.

2020 сыл кулун тутар ыйыгар межведомственнай хамыыһыйа мунньаҕар сир баайын хостуур тэрилтэ үлэтэ көрүллэрин туһунан быһарыы ылылынна.

Ону тэҥэ Иенгра олохтоохторо сир баайын хостооччулар экологическэй экспертизаны оҥорботохторун уонна хаһаайыстыбаннай үлэни ыытыы туһунан иһитиннэрии үлэтин ыыппатахтарын туһунан үҥсүүлэригэр ыйбыттар.

Бэриллибит боппуруостары барытын Сахамин Афанасьев тус хонтуролугар ылла.