«Стартап Экспедиция» сүүмэрдиир этабын кыайыылаах бырайыагын «Умный город» форумҥа билиһиннэриэхтэрэ

«Стартап Экспедиция» сүүмэрдиир түһүмэҕин кыайыылааҕа, бэйэтэ айбыт өйдүүр кыахтаах видео кэтэбил бырайыагын сэтинньи 27-28 күннэригэр киин куоракка ыытыллар «Өйдөөх куорат» форумҥа билиһиннэриэ. Бу туһунан СӨ инновация, цифровой сайдыы уонна инфокоммуникационнай технология министиэристибэтин пресс-сулууспата иһитиннэрэр.

Бу бырайыак геомаркетинговай чинчийиилэри ыытарга куорат уулуссаларыгар төһө киһи уонна тырааныспар хайа диэки тоҕуоруспутун ыйар бырагыраамаллаах аппарааттар холбоһуктарынан буолар.

Бырайыак ааптара Евгения Соболева этэринэн, маннык систиэмэ куорат хайа эрэ өттүн интэриэһиргээн, анаан анализтаан көрөргө кыаҕы биэрэринэн туһалаах.

 «Маннык информация реклама атыылаһар уонна баннердары ыйыыр дьоҥҥо эмиэ туһалаах буолуо. Биһиги систиэмэбит көмөтүнэн туһааннаах рекламнай щит аттынан күннэтэ хас киһи ааспытын 100 % чопчу этэр кыахтаах. Дьиҥэ, биһиги систиэмэбитин туһаныахха сөптөөх ньымата баһаам», — диэн Евгения Соболева бэлиэтиир.

«Стартап Экспедиция» сүүмэрдиир түһүмэҕэ Уһук Илин тоҕус куоратыгар: Владивостокка, Хабаровскайга, Благовещенскайга, Биробиджаҥҥа, Улан-Удэҕа, Петропавловск-Камчатскайга, Читаҕа, Соҕуруу Сахалиҥҥа буолан ааста. Бүгүн сэтинньи 26 күнүгэр Магадаҥҥа буола турар.

Бу тэрээһиҥҥэ барыта 550-тан тахса Уһук Илин олохтооҕо 81 стартабынан кыттыыны ылла. Бүгүҥҥү туругунан, финалга кыттыахтаах  12 эрэгийиэн кыайыылааҕын таллылар, 10 бырыайыак ааптардарын «В8» Акселератор сүүмэрдээһинигэр ыҥырдылар.

Бүтэһик сүүмэрдиир түһүмэх сэтинньи 30 күнүгэр Дьокуускай куоракка «Россия  — мин устуоруйам» түмэлгэ ыытыллыаҕа. Бу күн «Демо күн» чэрчитинэн, «В8» акселерационнай бырагыраамаҕа ааспыт саха стартаптара бэйэлэрин бырайыактарын инвестордар, экспиэрдэр уонна ыалдьыттар иннилэргэр билиһиннэриэхтэрэ.

Тэрээһин финала ахсынньы ортотугар Москваҕа буолуо. Кыайыылаах 2020 сыл ыам ыйыгар Москваҕа Startup Village барар кыахтаныа.

Ону таһынан, бастыҥ стартаптар Акселератор «В8» сайдыы бырайыагын аныгыс сүүмэрдээһинигэр ыҥырыллан, бырайыактарын сайыннарарга икки мөлүйүөн солкуобайы ылар кыахтаныахтара.

Эрдэ биһиги ханаалбыт Саха сиригэр ыытыллар «Умный город» форумҥа модератор уонна спикер быһыытынан дойду бастыҥ эспиэрдэрэ, министиэристибэлэр уонна салалталар салайааччылара, регионнар бэрэстэбиитэллэрэ кэлиэхтэрэ диэн иһитиннэрбитэ. Чуолаан эттэххэ, Россия бэрэсидьиэнин Уһук Илиҥҥи федеральнай уокуругар боломуочуйалаах бэрэстэбиитэлэ Юрий Трутнев уонна дойду тутууга миниистирэ Владимир Якушев кэлэллэрэ күүтүллэр.