Эльгэтээҕи саппаас баайдаах сир чугаһыгар олохтоох бөһүөлэк тутуохтара

«А-Проперти» бөлөххө киирэр «Эльгауголь» хампаанньа Нерюнгри оройуонугар баар Эльгэтээҕи таас чохтоох сир чугаһыгар олохтоох бөһүөлэк тутуоҕа. Бу туһунан СӨ бырамыысыланнаска министиэристибэтин пресс-сулууспата иһитиннэрэр.

Бүгүҥҥү күҥҥэ хампаанньа уонна бэдэрээччиттэр үлэһиттэрэ олорор бөһүөлэктэрин саҥардыы үлэлэрэ ыытыллаллар. Үлэ бастакы түһүмэҕэр туттуллубут ууну ыраастыыр систиэмэ саҥардыллара этиллэр.

«Баар тутуулары саҥардыыны уонна саҥалары атыылаһыыны ааҕан туран, үлэлэр уопсай суумалара 55 мөлүйүөнтэн тахса солкуобайга тэҥнэһиэҕэ. Ону тэҥэ 15 мөлүйүөн солкуобайдаах иһэр ууну ыраастыыр установканы атыылаһыы былааннанар. Үлэлэр 2020 сыл бүтүөр диэри түмүктэнэллэрэ күүтүллэр», — диэн этиллэр.

Маны таһынан, Эльгэтээҕи саппаас баайдаах сир чугаһыгар өссө икки саҥа бөһүөлэк тутуллара былааннанар: бастакы түһүмэххэ алта тыһыынча киһиэхэ — баахтабай, иккискэ — 20 тыһыынча киһиэхэ олохтоох. Үлэһиттэргэ табыгастаах буоларыгар бөһүөлэктэр бары социальнай инфраструктуранан хааччыллыахтара.

Хампаанньа хайыы үйэ аэропорду тутуу бырайыагын саҕалаабыта бэлиэтэнэр. Кэлин манна оскуола, оҕо уһуйаана, балыыһа уонна да атын социальнай уонна сынньалаҥ эбийиэктэрин тутары былаанныыр.