«Эн-сулускун 50+» бырайыак сүүмэрдиир түһүмэхтэрин тэрийии тохтоото

Саха телевидениетэ дьон-сэргэ сэҥээриитин ылбыт «Эн-сулускун 50+» телевизионнай күрэх сүүмэрдиир түһүмэхтэрин тэрийиини тохтотто. Маннык быһаарыыны тэрийэр бөлөх Саха сиригэр коронавирус ыарыыта тарҕаныытын утары ыытыллар дьаһалларга олоҕуран ылынна.

«Коронавирус тарҕаныытын утары миэрэлэргэ болҕомтолоох буолуохха наада. Ыытыллар дьаһаллары барытын тутуһар ирдэнэр», — диэн «Саха» НКИХ генеральнай продюсера Ньургун Торговкин эттэ.

Санатан эттэххэ, муус устар 10 күнүгэр диэри өрөспүүбүлүкэ үрдүнэн 50-тэн элбэх киһилээх култуурнай-маассабай уонна спортивнай тэрээһиннэри ыытыы бобуллубута.