Этнолог-учуонай Улла Йохансен күн сириттэн күрэммит

Этнолог-учуонай, «Орнаментальное искусство якутов» монография ааптара, Саха сирин эдэр чинчийээччилэригэр анал стипендия олохтообут Улла Йохансен күн сириттэн күрэммит. Бу туһунан өрөспүүбүлүкэтээҕи национальнай библиотека прессс-сулууспата иһитиннэрэр.

Улла-Кристин Йохансен 1927 сыллаахха Таллин куораҥҥа күн сирин көрбүт. 1939 сыллаахха дьиэ кэргэнэ Германияҕа көспүт. Онно олорон кини этнографическай коллециялар историческай-култуурнай нэһилиэстибэлэринэн, ону тэҥэ хотугулуу-илиҥҥи Европа уонна Сибиир регионнарынан интэриэһиргээбит.

Үнүбэрсиэти бүтэрэн баран Гамбург этнографисечкай түмэлин Азия салаатыгар үлэҕэ киирбит. Үлэлиир кэмигэр 1953 сыллаахха «Орнаментальное искусство якутов» диэн диссертациятын көмүскээбит.

1973 сыллаахха Улла Йохансен Кельн үнүбэрсиэтин култуура уонна социльнай антропология салаатын сэбиэдиссэйинэн анаммыт. Онно үлэлии сылдьан профессор буолбут. Академическай карьератын усталын тухары сүрүн болҕомтотун Сибииргэ, хотуглуу-илиҥҥи Европаҕа уонна орто Азияҕа уурбут.

2018 сыллаахха Сибиирдээҕи түүр норуоттар исторяларын уонна култуураларын үөрэтиигэ кылаатын иһин Миклухо-Маклай аатынан кыһыл көмүс мэтээлинэн бэлиэтэммит.

2008 сыллаахха Саха сирин норуоттарын музыкатын уонна фольклорун түмэлэ бастакы диссертациятын нуучча тылынан тылбаастаан таһаарбыт.

Саха сирин уонна Германия учуонайдара наука уонна үөрэх ситимигэр сибээстэрин сайыннарыы ирдэнэрин бэлиэтии көрөн, 2014 сыллаахтан DAAD пуонда өйөбүлүнэн Саха сирин эдэр учуонайдарыгар бэйэтин анал стипендиятын олохтообут. Стипендиаттарга Германия научнай-чинчийэр институттарыгар алта ый устата бэйэлэрин чинчийиилэрин ыытар кыах биэрибит.

2019 сыллаахха өрөспүүбүлүкэтээҕи национальнай бибилиотека учуонай-этнолог бэйэтин библиотекатын бэлэх туппут. Ол коллекция кинигэ пааматынньыктарын научнай-чинчийэр киинигэр хараллар.

«Мин сүрүн соругум — Саха сирэ наука уонна искуустуба киинин быһыытынан сайдыытыгар төһүү күүс буолуу. Ол аата мин кинигэлэрим Россия атын бибилотекаларыгар бэриллиэ уонна атыыланыа суохтаахтар. Библиотекам саҥа көлүөнэ учуонайдар үүнэн тахсалларыгар көмө буолара — миэхэ улахан чиэс», — диэн Улла Йохансен бибилотека салалтатыгар суругар суруйбут.