Галина Данчикова: Айсен Николаев Саха сиригэр дьон уйгутун үрдэтии бырагырааматын бигэргэттэ

Россия Госдуматын дьокутаата Галина Данчикова Ил Дархан Айсен Николаев өрөспүүбүлүкэ олохтоохторун олоҕун таһымын үрдэтиини түргэтэтэр тосхоллоох Саха сиригэр дьадайыыны утары охсуһуу бырагырааматын бигэргэппитин туһунан санаатын эттэ.

«Мин сыыппаралар, бүддьүөт көрдөрүүлэрэ, төһө да үрдүк буолбуттарын иһин, бу сүрүн сыал буолбатаҕын туһунан өрөспүүбүлүкэ баһылыгын этиитин кытта сөбүлэһэбин. Саха сирин былаас уорганнарын таһаарыылаах үлэтин түмүгүнэн чахчы дьон олоҕун хаачыстыбатын тупсарыы уонна хас биирдии киһи уйгутун үрдэтии буолуохтаах. Бу сыалы түргэнник ситиһэргэ Айсен Николаев дьадайыыны утары охсуһуу бырагырааматын бигэргэттэ», – диэн кини эттэ.

Ону таһынан, Ил Дархан туһаайыылара Россия бэрэсидьиэнэ кэлэр уон сылга туруорбут национальнай сыалларыгар уонна стратегическай соруктарыгар эппиэттииллэрин бэлиэтээтэ — дьон доруобуйатыгар уонна уйгутугар, олорорго табыгастаах эйгэни оҥорууга, сөптөөх үлэни, ситиһиилээх урбааны уонна цифровой сайдыыны тэрийиигэ.

Ил Дархан Айсен Николаев дьарыктаах буолууну уонна тыа сирин олохтоохторун дохуотун үрдэтиигэ туһаайыллар миэрэлэри ыйда. Ол курдук, үүтү оҥорон таһаарыыны субсидиялааһын саҥа механизма тыа хаһаайыстыбатын үлэһиттэрин дохуотун 47 %-нан улаатыннарарга көмөлөһүөҕэ. Оттон тыа хаһаайыстыбатын бородуукталарын оҥорооччулары, кооперативтары, дьиэ кэргэн фермаларын өйөөһүҥҥэ судаарыстыба өйөбүлүн көрүҥэ кэҥиэҕэ. 2021 сылга «Төрүт куораттар уонна сэлиэнньэлэр» өрөспүүбүлүкэтээҕи бырайыакка биир миллиард солкуобай көрүлүннэ — бу үп баһылыыр өттө үлэ төлөбүрүгэр ыытыллыаҕа.

«Олохтоох каадыры — бырамыысыланнаска» бырайыагынан Саха сирин олохтоохторун үлэнэн хааччыйыы боппуруоһугар үлэ биэрээччилэри кытта алтыһыыга саҥа ньымалары ирдиирин Галина Данчикова бэлиэтээтэ.

«Айсен Сергеевич баахтабай ньыманан үлэлиир дьон үөрэтиини, олорууну, медицинскэй өҥөнү ылыыны кытта сибээстээх кыһалҕаларын ыйбытын тоһоҕолуохпун баҕарабын. Мин маны үчүгэйдик билэбин. Бу чахчы сытыы боппуруостар, кинилэри сокуон таһымыгар быһаарыы ирдэнэр. Билигин манан дьарыктанабын уонна бу үлэҕэ Ил Түмэн судаарыстыбаннай мунньаҕыттан кэллиэгэлэрим суһаллык кыттыһалларыгар эрэнэбин», – диэн эттэ.