Галина Данчикова: Төрүт сокуоҥҥа киирэр көннөрүү үгүс өттө социальнай хайысхалаах

РФ Государственнай Думатын Саха сириттэн дьокутаата Галина Данчикова дойду Төрүт сокуонугар көннөрүүлэри киллэрии туһунан сокуон барылын өйөөтө. Бу туһунан Федеральнай Сэбиэт сайтыгар этиллэр.

«Сүрүн сокуоҥҥа хамнас алын кээмэйэ үлэлиир кыахтаах киһи тиийинэн олоруутун алын кээмэйиттэн намыһах буолуо суохтааҕын туһунан өйдөбүл бигэргэтиллэр. Маннык пуун Төрүт сокуон 75 ыстатыйатыгар эбиллэр», – диэн Галина Данчикова эттэ.

Биэнсийэ булгуччу индексацияланыахтааҕын туһунан көннөрүү киирэрэ, ону тэҥэ оҕо уонна дьиэ кэргэн дойду судаарыстыбаннай бэлиитикэтин сүрүн хайысхаларынан туһаайыллыбыттарын бэлиэтээтэ.

«Оҕо өй-санаа, майгы-сигили, эт-хаан өттүнэн сайдарыгар, дойдуга бэриниилээх, эппиэтинэстээх уонна аҕа дьоҥҥо убаастабыллаах сыһыаннаах буола улаатарыгар судаарыстыба бары усулуобуйаны тэрийэр», – диэн Госдума дьокутаата бэлиэтээтэ.

Төрүт сокуоҥҥа киирэр уларытыылары ылыныы туһунан сүрүн быһаарыы — дойду олохтоохторугар буоларын Галина Данчикова тоһоҕолоото.

Инники этиллибитинэн, Россия бэрэсидьиэнэ Владимир Путин муус устар 22 күнүн бүтүн дойду үрдүнэн Төрүт сокуоҥҥа киирэр уларытыыларынан норуот куоластааһынын күнүнэн бигэргэппитэ.