Горнайга уруһуйдьут кыргыттар маастар-кылаастары ыыталлар

НВК САХА – Горнай улууһугар Айталина Никифорова уонна Венера Романоваайар холбоһуктара бу сайыҥҥыттан уруһуй араас көрүҥэр маастар-кылаастары ыытан саҕалаатылар.

Уруһуйдьут идэлээх кыргыттар Айталина Никифорова уонна Венера Романовамаҥнай утаа иис-уус кэрэ эйгэтигэр үлэлээбиттэрэ. Ол эрээри бу сайыҥҥыттан уруһуйдьут санаалара өтөн итиэннэ бэйэлэрин үөрүйэхтэрин нэһилиэнньэ киэҥ араҥатыгар билиһиннэрэр, тарҕатар сыалтан маастар-кылаастары ыытарга санаммыттар.

“Иккиэн уруһуйдуохпутун баҕарар буолан, улахан дьоҥҥо уонна оҕолорго маастар-кылаастары ыытыахха диэн тэринэн саҕалаатыбыт. Инникитин үлэбитин өссө кэҥэтэн, атын көрүҥнэри киллэриэхпитин баҕарабыт. Таҥаска эмиэ уруһуйдуохтарын сөп, матырыйаалбытын барытын атыыласпыппыт”, – дэһэллэр кыргыттар.

Дьарыктар улахан дьоҥҥо уонна оҕолорго тус-туһунан бөлөхтөрүнэн ыытылыннылар. Бүгүн номнуо 10-с дьарыкка кырачааннар холстаҕа фантазийнай уруһуйга уонна хаамыскаҕа акрил кыраасканан уруһуйдуурга холонон көрдүлэр.

Айар холбоһук кэрэ куолара инникитин да бу курдук нэһилиэнньэҕэ анаан маастар-кылаастары ыытар баҕалаахтар.