ГРЭС-2 иккис уочарата 2025 сылга үлэҕэ киириэҕэ

Дьокуускайдааҕы ГРЭС-2 иккис уочарата 2025 сылга үлэҕэ киириэҕэ. Ил Дархан Айсен Николаев уонна РусГидро бырабылыанньатын бэрэссэдээтэлэ-генеральнай дириэктэрэ Николай Шульгинов Москваҕа эбийиэк тутуутун уонна өрөспүүбүлүкэ электроэнергиятын салаата сайдыытын боппуруостарын туһунан дьүүллэстилэр. Бу туһунан хампаанньа пресс-сулууспата иһитиннэрэр.

Көрсүһүү кэмигэр ураты болҕомто Тикси бөһүөлэгэр Дьоппуон хампаанньатын кытта бииргэ тыалынан барар дизельнай установка комплексын тутуу инновационнай бырайыагар уурулунна. Билигин РусГидро хампаанньа уопсайа 3 МВт кыамталаах үс генераторынан хааччыллар дизельнэй уот станциятын уонна электроэнергияны мунньар систиэмэ тутуутун ыытар. Ол кэнниттэн тыалынан барар систиэмэ, уот станция уонна уоту мунньуу систиэмэтэ биир энергетическэй ситимҥэ түмүллүөхтэрэ.

Маны тэҥэ Николай Шульгинов уонна Айсен Николаев Дьокуускайдааҕы ГРЭС-2 иккис уочаратын тутууга РусГидро уонна Саха сирин бырабыыталыстыбатын бииргэ үлэлэһиилэрин тула дьүүллэстилэр.

«Саҥа эбийиэк үлэттэн таһаарыллар Дьокуускайдааҕы ГРЭС оннугар тутуллуоҕа. Саҥа ититиинэн үлэлиир станция электрическэй кыамтата — 157,4 МВт, ититиитин кыамтата – 200 Гкал/ч тэҥнэһиэҕэ. 2025 сылга үлэҕэ киирэрэ былааннанар», – диэн этиллэр.

2019 сыл от ыйыгар бырайыак Россия бырабыыталыстыбатынан бигэргэтиллибит, тутуллуохтаах ититиинэн үлэлиир уот станцияларын испииһэгэр киирбитэ этиллэр.

Көрсүһүү ураты боппуруоһунан Саха сиригэр тарыып олохтонуута буолла. Икки өрүттэр иккиэн уот станцияларын тутуу ороскуотун учуоттааһыҥҥа тарыып аҕыытыгар ураты болҕомто ирдэнэрин бэлиэтээтилэр.