Хаҥалас үс кооператива өрөспүүбүлүкэтээҕи куонкуруска кыайда

«Хаҥалас-Ас», «Бөртө-Ас» уонна «Самартай» тыа хаһаайыстыбатын оҥорон таһаарааччылара өрөспүүбүлүкэтээҕи «Продовольствие» быыстапка-дьаарбанкаҕа бириистээх миэстэлэри ыллылар. Бу туһунан Хаҥалас улууһун дьаһалтатын пресс-сулууспата иһитиннэрэр.

2020 сыллаахха Кыһыл Үрүйэ сэлиэнньэҕэ сыыр оҥорор сыаҕы үлэлэтэн саҕалаабыт «Ханалас-Ас» кооператив «Булуус» бородууктата «Кытаанах сыыры оҥорон таһаарыы» хайысхаҕа үһүс миэстэни ылла.

Ону тэҥэ коопериатив «Киви-банан» уонна «Ойуур отонноро» йогуртара «Йогурту оҥоруу» хайысхаҕа үһүс буоллулар. Оттон 2021 атыыга тахсыбыт үүттэн оҥоһуллубут «Мичийэ» кэмпиэттэрэ «Кондитерскай оҥоһуктары оҥорон таһаарыы» хайысхаҕа иккис миэстэни ылла.

«Бөртө-Ас» кооператив «Эт полуфабрикаттарын оҥорон таһаарыы» хайысхаҕа үһүс буолла . Хаһаайыстыба куонкуруска ынах этиттэн оҥоһуллубут кэтилиэттэри, биточкалары уонна хааны туруорда.

«Самартай» кооператив 2020 сыл саас оҥорон саҕалаабыт тушенката «Эт бородууксуйатын хайысхатыгар саҥа бородууксуйаны оҥорон таһаарыы» хайысха дипломунан наҕараадаланна.

Саха сирин тыатын хаһаайыстыбатын министиэристибэтин үүттэн, эттэн, балыктан уонна отонтон оҥоһуллубут олохтоох бородууксуйа куонкуруһа 21 хайысханан ыытылынна.