Хаҥалас улууһугар былыргы сэлии уҥуоҕа көһүннэ

Хаҥалас улууһугар Сааһаабыт үрэх чугаһыгар сэлии уонна атын түҥ былыргы кыыллар уҥуохтарын буллулар.

Былыргы кыыллар уҥуохтарын бульдозерист Игорь Решетников карьерга үлэтин кэмигэр булла. Геология салаатыгар 15 сыллаах үлэтин уопутугар олоҕуран, көстүбүт уҥуох сэлии киэнэ буоларын тута быһаарда.

Ийэтэ Наталья Решетникова сэдэх булумньу көстүбүтүн туһунан кыраайы үөрэтээччи Прокопий Ноговицынҥа иһитиннэрдэ. Кыраайы үөрэтээччи «Эллайада — Күһүн 2020» оскуола оҕолорун экспедициятын кытта булумньу көстүбүт сиригэр таҕыста.

Көстүбүт уҥуохтар син бөдөҥ сэлии тааһын уонна көхсүн хаптаҕай уҥуохтара буолаллара быһаарылынна. Ону тэҥэ сабаҕалааһынынан түҥ былыргы бизон, түүлээх носорог уонна Өлүөнэ сылгытын уҥуохтарын буллулар.