Хаҥалас улууһугар үс күннээх кутурҕан биллэрдилэр

Хаҥалас улууһугар Чапаево бөһүөлэгэр тахсыбыт баһаарга дьон тыыннара былдьаммытынан кутурҕан биллэрилиннэ. Бу туһунан Хаҥалас дьаһалтатын пресс-сулууспата иһитиннэрэр.

«Улууспутугар ыар алдьархай таҕыста, олохтоохтор суорума суолламмыттара икки бүк ыар. Тыыннара быстыбыттар уонна эмсэҕэлээбиттэр аймахтарыгар уонна чугас дьонноругар дириҥ кутурҕаммыт биллэрэрбин. Бу уустук кэмҥэ биһиги бастакы сорукпут – дьиэтэ суох хаалбыттарга кыһамньы оҥоруу», — диэн улуус баһылыга Олег Иринеев эттэ.

Билиҥҥи туругунан тоҕус киһини наука алын академиятын интэрнээтигэр олохтоотулар, атыттар — аймахтарынан. Нэһилиэк дьаһалтатын исписэлиистэрэ эмсэҕэлээбиттэр докумуоннарын оҥороллоругар күүс көмө буолаллара этиллэр.

«Биир күннээх хамнаспытын ыытар счет чуолкайданар. Улуус дьаһалтатын саппаас пуондатыттан аадырыстаах көмө оҥоһуллуоҕа», — диэн баһылык эбэн эттэ.

Суорума суолламмыт дьон аймахтарын кытта психологтар үлэлииллэр. Баһаар бэҕэһээ, муус устар 7 күнүгэр Хаҥалас улууһун Өктөмүгэр тахсыбыта. 1997 сылга тутуллубут икки этээстээх элбэх кыбартыыралаах дьиэҕэ үксүн эдэр ыал олорбута бэлиэтэнэр.