Хаҥалас улууһугар ыһыы үлэлэригэр бэлэмнэнии саҕаланна

Хаҥалас улууһун хаһаайыстыбалара сааскы ыһыыга бэлэмнэниини саҕалаатылар. Бүгүҥҥү күҥҥэ ыһыы сиэмэни тиэйии дуогабардара бары баттаннылар. Бу туһунан улуус дьаһалтатын пресс-сулууспата иһитиннэрэр.

«Былаан быһыытынан ыам ыйын бастакы декадатыгар үлэ барыта саҕаланыахтаах. Сотору кэминэн сиэмэлэри уонна минеральнай уоҕурдуулары тиэйиини түмүктүөхтээхпит», — диэн улуус баһылыгын э.т. Федор Борисов эттэ.

Быйыл улуустан сүөһү аһылыгын сиэмэтин ылыы ороскуотун 60 %- гар тиийэ кэмэйдээх субсидия көрүллэрэ бэлиэтэнэр.

2020 сылга оройуоҥҥа ыһыы уопсай былаана түөрт тыһыынча кэриҥэ гектарга тэҥнэһиэҕэ. Олортон сүөһү аһылыгын култуураларыгар икки тыһыынчаттан тахса гектар иэннээх сир көрүлүннэ. Балтараа тыһыынчаттан тахса гектар иэннээх сиргэ бурдук култууралара ыһыллыахтара. Хортуоппуй былаана 700 гектарга тэҥнэһэр, атын аһаҕас буорга олордуллар оҕуруот аһын былаана — 135 гектарга.