Хаҥаластар 2 тыһ. тоннаттан тахса оҕуруот аһын ылары былаанныыллар

Быйыл Хаҥалас оройуонун хаһаайыстыбата 2 тыһ. тоннаттан тахса оҕуруот аһын ылары былаанныыр. Оҕуруот аһын үүннэриинэн оройуоҥҥа уопсайа 14 хаһаайыстыба дьарыктанарын туһунан бэрэсэдьиэн уонна өрөспүүбүлүкэ бырабыыталыстыбатын пресс-сулууспата иһитиннэрэр.

         «Бүгүҥҥү туругунан бу хаһаайыстыбаҕа хаппыыста үүнүүтэ үчүгэй. Урукку сылларга оҕуруот сыыс отун үөрэнээччилэр уонна устудьуоннар ыраастыыр эбит буоллахтарына, быйыл пандемиянан сибээстээн бэйэ үлэһиттэрин күүһүнэн ыытылынна», — диэн Саха сирин тыатын хаһаайыстыбатын миниистирэ Александр Атласов иһитиннэрдэ.

         Кини оҕуруот үүнүүлээх сирдэрин көрдө, үлэһиттэри кытта кэпсэттэ, «Сайдыы» тыа хаһаайыстыбатын үлэтин-хамнаһын билсэ Күөрдэм бөһүөлэгэр сырытта.

         Бэлиэтээн эттэххэ, «Сайдыы» тыа хаһаайыстыбата оройуон биир бастыҥ көрдөрүүлээх хаһаайыстыбата буолар. Манна 23,5 га иэннээх сиргэ хортуоппуй,  15,9 га иэннээх сиргэ оҕуруот аһа, 5 га сиргэ сүбүөкүлэ,  4 гааҕа — хаппыыста, 6 га иэннээх сиргэ моркуоп үүннэрэллэр.