Дьокуускайга ый саҕаланыаҕыттан суолга халтарыйан 80-ча киһи илиитин-атаҕын тоһуппут

Дьокуускай хомунаалынай сулууспалара кыһыҥҥы үлэ графигар киирдилэр. Сөҥүү күүскэ түһэн, суолга-иискэ халтараан буолла. Онон кэнники күннэргэ суол быһылаана, дьон эчэйэрэ элбээтэ.

Киин куоракка хаар түһэн, өрүү буоларын курдук, уулуссалар килиэ муус буоллулар. Атын куораттарга дьон халтарыйбатын туһугар анал реагеннары кутар буоллахтарына, биһиэхэ кумахтан атыны тобула иликтэр. Онон кыра наадалаах киһи уулуссаҕа тахсыбат.

Оттон суоппардар массыыналарыгар кыһыҥҥы көлөһөлөрүн кэтэрдэр түбүккэ сылдьаллар. Маннык көлөһөлөр мууска, хаарга техника халтарыйбатын диэн тимир тиһиликтээх.

Дьон-сэргэ бачча халтарааҥҥа эчэйэрэ кэмнээх буолуо дуо? Куорат травмпуунугар ый саҕаланыаҕыттан 80-ча киһи илиитин-атаҕын тоһутан киирбит.

«Атах таҥаһыгар кэтэрдэр анал тэриллэр бааллар, ону кэтэ сырыттыннар. Былчыҥ, уҥуох күүрбэккэ сылдьыахтаах, оччоҕо уҥуох тостубат», — диэтэ 2№-дээх өрөспүүбүлүкэтээҕи балыыһа травматология салаатын сэбиэдиссэйэ Степан Тордуин.

Суолга-иискэ араас быһылаан, дэҥ-оһол тахсыбатын туһугар киин куорат уулуссаларыгар кумаҕы кутар 13 техника үлэлиир. Кинилэр үс күн иһигэр 650 кубометр кумаҕы куппуттар. Ону таһынан хаары ыраастыыллар.