Хабиб Нурмагомедов Саха сирин дизайнера оҥорбут Фергюсоннуун охсуһуутугар аналлаах постерын таһаарда

UFC чөмпүйүөнэ Хабиб Нурмагомедов Instagram социальнай ситимҥэ бэйэтин страницатыгар Тони Фергюсоннуун утары охсуһуутугар аналлаах Саха сирин дизайнера Феоктист Алексеев оҥорбут постерын таһаарда.

«Хаттаан устуоруйаны оҥоруоххайыҥ», — диэн Хабиб Нурмагомедов хаартыскатын анныгар суруйбут.

Постерга охсуһуу аренатыгар Хабиб Нурмагомедов Тони Фергюсоҥҥа утары хааман иһэрэ ойууламмыт. Хабиб кэннигэр киниэхэ хотторбут спортсменнар бааллар, олор быыстарыгар Ирландия охсуһааччыта Конор Макгрегор олороро көстөр. Постерга UFS баһылыга Дейн Уайт эмиэ баар.

Феоктист Алексеев этэринэн бу үлэтин кини үс чааһынан бүтэрбит. Бу постер саха дизайнерын бастакы үлэтэ буолбатах, кини социальнай ситимҥэ баар бэйэтин страницатыгар араас актуальнай аан дойду түбэлтэлэригэр сыһыаннаах фан-артары, уруһуйдары таһаарар.

«2019 сыллааха мин үлэлэрбин Конор Макгрегор, Дастин Портье, Забит Магомедшарипов, Жозе Альдо бэйэлэрин Instagram страницаларыгар таһаарбыттара», — диэн Феоктист Алексеев эттэ.