Хатаска 100 төбө холмогор боруода ынаҕы аҕаллылар

Хатас бөһүөлэгин «Баҕарах» тыа хаһаайыстыбатын комплекса Татарстантан 100 төбө холмогор боруода уулаах ынаҕы тутта. Бу туһунан куорак уокуругун дьаһалтатын пресс-сулууспата иһитиннэрэр.

«Баҕарах» дириэктэрэ Иван Сивцев тириэрдэринэн ынахтар айаны этэҥҥэ аһарбыттар.

«Сэтинньиттэн саҕалаан төрөөн киирэн барыахтаахтар. Билигин сүүс буоллахтарына, кыһыары икки төгүл элбиэхтээхтэр. Бүтэһигин 2015 сыллаахха уулаах ынахтары аҕалбыппыт», – диэн дириэктэр кэпсээтэ.

Тыа хаһаайыстыбатын миниистирин солбуйааччыта Николай Афанасьев бэлиэтииринэн, бу ынахтар Хатас нэһилиэгэр селекционнай племенной үлэни сайыннарыыга тирэх буолуохтара.

«Быйыл Саха сиригэр уопсайа 865 төбө сүөһү тириэрдилиннэ. Федеральнай хааһынаттан сүөһү атыытын толуйууга 100 мөлүйүөн солкуобайга көрүллүбүтэ, бу уопсай бүддьүөт 98 %-гар тэҥнэһэр», – диэн Николай Афанасьев эттэ.

Холмогор боруода ынах хоту баар Архангельскай уобаластан төрүттээх буолан, тымныы климакка түргэнник үөрэнэрэ этиллэр.