ХИФУ 200-тэн тахса бырагыраамата Арктикаҕа сыһыаннаах

Хотугулуу-илиҥҥи федеральнай университет 200-тэн тахса бырагыраамата арктическай регионнарга туһуламмыт. Бу туһунан үөрэх кыһатын пресс-сулууспата иһитиннэрэр.

«Университет үлэтин биир сүрүн хайысхатынан Арктика регионнарыгар исписэлиистэри бэлэмнээһин буолар. Ылан көрдөххө, араас идэҕэ үөрэнэр уон тыһыынчаттан тахса устудьуон Арктикаҕа үлэлиир кыахтаах», — диэбит ректор Анатолий Николаев.

2020 сылга 25 устудьуон Арктикаҕа үлэлииргэ дуогабар баттаспыт. «Арктика улуустарыгар үлэ миэстэтэ суох. Ол гынан баран, сир баайын хостуур тэрилтэлэр сыаллаах сакаас оҥоруохтарын сөп. Маннык үлэһиттэр наадалар диэн эттэхтэринэ, устудьуоннар дуогабардаһан, үөрэхтэрин бүтэрэн баран, чопчу онно үлэлии баралларын курдук», — диир Анатолий Николаев.

Ааспыт үс сылга университеты бүтэрээччилэртэн арктическай оройуоннарга 140 тахса киһи үлэлии барбыт. Сүрүннээн учууталлар уонна быраастар.