ХИФУ бастыҥ устудьуоннарыгар «Якутскэнерго» стипендияларын туттардылар

ХИФУ Физико-техническай институтун түөрт устудьуонугар «Якутскэнерго» анал стипендияларын туттардылар. Бу туһунан үрдүк үөрэх кыһатын пресс-сулууспата иһитиннэрэр.

«Якутскэнерго» хампаанньаны 31 сыл устата салайбыт Анатолий Чубчиков аатынан сыллата бэриллэр стипендиялары быйыл төрдүс курс устудьуоннара Валентин Шадрин уонна Нарыйа Афанасьева, ону тэҥэ үһүс курс устудьуоннара Дьулурхан Бурцев уонна Тимофей Колмогоров ыллылар.

«Биһиги хампаанньабыт ХИФУ Физико-техническай институтун кытта Якутскэнерго салааларыгар идэтийбит кадрдары бэлэмнээһиҥҥэ өр сыллар усталарыгар таһаарыылаахтык үлэлиир. Кыһамньылаахтык үөрэнэр, өрөспүүбүлүкэ энергетикэтигэр туһалаах чинчийэр бырайыактары оҥорон устудьуоннары өйүүбүт уонна хампаанньабытыгар үлэлии кэлэргэ көҕүлүүбүт», – диэн хампаанньа генеральнай дириэктэрэ Алексей Стручков эттэ.

Стипендиаттар бары «Якутскэнерго» хампаанньаҕа практикаларын ааһаллара уонна кэлин манна үлэли кэлэр былааннаахтара бэлиэтэнэр.

Стипендия 2000 сыллаахха ХИФУ Физико-техническай институтун «Электроэнергетика уонна электротехника» уонна «Теплоэнергетика уонна теплотехника» идэлэригэр үөрэнэн устуодьуоннары үөрэххэ уонна научнай- чинчийэр үлэҕэ көҕүлүүр сыаллаах төрүттэммит.

Куонкуруска бүтэһик үс семестр түмүгүнэн «туйгуннук» уонна «үчүгэйдик» үөрэнэр, үнүбэрсиэт культурнай уонна уопсастыбаннай олоҕор көхтөөхтүк кыттар, научнай- чинчийэр үлэҕэ уһулуччу көрдөрүүлээх устудьуоннар кыттыыны ылаллар.