ХИФУ былыргы харамайдар өлүктэрин чинчийэргэ 10 мөл. солк. граны ылла

Хотугулуу-Илиҥҥи федеральнай үнүбэрсиэт учуонайдара плейстоцен кэминээҕи былыргы кыра харамайдар өлүктэрин чинчийэргэ Россия фундаментальнай чинчийиилэргэ пуондатын 10 мөлүйүөн солкуобай суумалаах гранын ылла. Бу туһунан үрдүк үөрэх кыһатын пресс-сулууспата иһитиннэрэр.

Чинчийэр үлэ өрөспүүбүлүкэ арктикатын балаһатыгар ирбэт тоҥҥо көстүбүт кэрбээччилэр уонна куобахтыҥылар ураты булумньуларыгар олоҕуран ыытыллыаҕа.

«Бырайыак плейстоцен кэминээҕи мамонт фаунатын үөрэтии киин кыһалҕаларыттан биирдэстэригэр боччумнаах кылааты киллэрэргэ туһуланар – кыра харамайдар үөскээһиннэрин быһаарыыга. Чинчийии Арктика түҥ былыргы палео эйгэтин уонна көрүҥнэр күн сириттэн симэлийиилэрин быһаарар соруктаах», – диэн этиллэр.

Учуонайдар икки сыл устата кэрбээччилэр уонна куобахтыҥылар былыргы өлүктэрин чинчийиигэ олоҕуран, пелео эйгэ таксономическай статуһун уонна дьүһүннээһиннэрин быһаарыахтара.

Бырайыак түмүгүнэн, криолитозона ньуура уонна климата уларыйыытын сабаҕалааһыҥҥа туһаныллыан сөп, мамонт фаунатын харамайдара олорон ааспыт эйгэлэрин реконструкцията оҥоһуллуоҕа.