ХИФУ дьон тоҕуоруһар сирин дезинфекциялыыр систиэмэни оҥордо

Хотугулуу-Илиҥҥи федеральнай үнүбэрсиэт инженердэрэ дьон тоҕуоруһар сирин дезинфекциялыыр мобильнай систиэмэни оҥордулар. Бу туһунан үөрэх кыһатын пресс-сулууспата иһитиннэрэр.

«Бу систиэмэ дьон тоҕуоруһар сирдэрин киирии ааннарын таҥастааһыҥҥа ананар. Тэрили оҥорууга тепловизор схиэмэлэрин, термодатчиктар систиэмэлэрин, убаҕас веществолар рецептураларын, атах таҥаһын ыраастыыр систиэмэлэр, тымныы туман уонна ультрафиолетовай ыраастааһын ULV генераторын таҥыы ураты ньымалара туһанылыннылар», — диэн «Future Skills: NEFU» киин инжиниэрнэй кластерын салайааччыта Алексей Скрябин кэпсээтэ.

Маҥнайгы лабораторнай чинчийиилэр үчүгэй түмүгү көрдөрдүлэр. Бүгүҥҥү күҥҥэ аэропортарга, улахан тутууларга, киинэ тыйаатырдарыгар, вокзалларга уонна өрүс пуортарыгар анаан «Страж» мобильнай дезинфекциялыыр систиэмэ үс көрүҥэ бэлэм.

Маны таһынан үөрэх кыһаларыгар, кыра тэрилтэлэргэ уонна атыы-эргиэн кииннэригэр анаан туспа судургутуллубут көрүҥнэрэ бааллара бэлиэтэнэр.