ХИФУ-ка саха косметическай препарата оҥоруһуллуоҕа

Хотугулуу-Илиҥҥи федеральнай үнүбэрсиэккэ коллагеннаах косметическай препараты оҥоруу үлэтэ хаһыс да сылын ыытыллар. Билигин патент ылар докумуона оҥоһуллар. Бу туһунан үнүбэрсиэт пресс-сулууспата иһитиннэрэр.

Хотугу балыктар устар хабахтарын гидролизацияламмыт коллагеныгар тирэҕирэн оҥоһуллар косметическай препараттары медицинэ үлэһиттэрэ уонна косметологтар кыттыһан оҥороллор.

«Балык коллагена ураты хаачыстыбалаах — гипоаллергеннай, киһи коллагенын кытта барсар, киһи тириитэ, иҥиирэ, уҥуоҕа саҥардылларыгар көмөлөөх буолан, араас эйгэҕэ туттуллуон сеп. Холобур, медицинэҕэ, косметологияҕа, аска-үөлгэ», — диэтэ бырайыак салайааччыта, химическэй наука доктора Наталия Петрова.

Наталия Петрова бэлиэтииринэн, үөрэтии эбийиэктэринэн хатыыс балык устар хабахтара эрэ буолбакка, чыыр, уомул уо.д.а. балыктар туһанылыннылар. Бу матырыйаал оҥоһуутугар уонна ылыллар препараттар сыаналарын аччатарга кыах биэрдэ.

ИЕН учуонайдара ылыллар бородуукта молекулярнай маассатын салайар уонна көдьүүстээхтик аччатарга кыах биэрэр гидролиз технологиятын оҥордулар. Гидролизацияламмыт коллаген бороһуога кыра кээмэйдээх эттиктэртэн турар, эчэйиини эмтээһиҥҥэ боруобаламмыта.

«Кыылларга оҥоһуллубут уопуттар ситиһиилээхтик ааспыттара, баастара түргэнник оспута. Бу көрдөрүү медицинэ эйгэтигэр ситиһиилээхтик туһаныллыан сөптөөҕүн ыйар», — диэн бырайыак салайааччыта түмүктээтэ.