ХИФУ норуоттар икки ардыларынааҕы интернет олимпиадаҕа кыайда

Хотугулуу-Илиҥҥи федеральнай үнбэрсиэт 2020 сыллааҕы норуотар икки ардыларынааҕы устудьуоннар аһаҕас интернет-олимпиадаларын кыайыылааҕынан буолла. Бу туһунан үөрэх кыһатын пресс-сулууспата иһитиннэрэр.

«Хотугулуу-Илиҥҥи федеральнай үнбэрсиэт аҕыс устудьуона эстественнэй-научна цикл предметтэригэр үрүҥ көмүс уонна боруонса мэтээллэри ылары ситистилэр, онон ХИФУ кыайыылаах үрдүк аатын сүктэ», – диэн этиллэр.

Физика, химия уонна математика олимпиадаларын иккис түһүмэҕэр Беларусия, Казахстан, Кыргызстан, Таджикистан, Узбекистан, Туркменистан уонна Россия 165 үрдүк үөрэх кыһатын 1518 устудьуона, ол иһигэр ХИФУ 41 устудьуона кыттыыны ылбыта этиллэр. Информатикаҕа, матырыйааллар утарсыыларыгар уонна теоретическэй механикаҕа 145 үрдүк үөрэх кыһатын 686 устудьуона, ол иһигэр 14 — ХИФУ үөрэнээччитэ.

«Экономика», «Статистика» уонна «Экология» хайысхалар иккис түһүмэхтэрэ 2020 сыл күһүнүгэр көһөрүлүннүлэр.