ХИФУ үс эдэр учуонайа Россия бэрэсидьиэнин гранын ылла

Хотугулуу-Илиҥҥи федеральнай үнүбэрситиэт үс чинчийээччилэрэ Алексей Таппахов, Александр Колесов уонна Нинель Малышева дойду бэрэсидьиэнэ Владимир Путин эдэр учуонайдарга туһаайыллар гранын ылары ситистилэр. Хас биирдиилэрэ бэйэтин чинчийиитин ыытарыгар 1,2 мөлүйүөн солкуобай суумалаах граны ылыаҕа. Бу туһунан үнүбэрситиэт пресс-сулууспата иһитиннэрэр.

ХИФУ медицинскай институутун үөрэҕириигэ уонна наукаҕа лабораториятын нейропсихологическай чинчийиилэргэ үрдүкү научнай сотруднига Алексей Таппахов чинчийиитэ Паркинсон ыарыытын эмтээһини тупсарыыга туһаайыллар.

«Бу ыарыыны эмтээһиҥҥэ иһиллэр эмп доруобуйаҕа атын өттүттэн куһаҕаннык дьайар. Ол сайдыытын урутаан билии көмөтүнэн эмтээһин бэрээдэгин көннөрүөхпүт. Грант үбүн реактивтары ылыыга уонна конференцияларга кыттыыга туһанар былааннаахпыт», − диэн кэпсээтэ.

Геологическай чинчийии факультетын сир аннынааҕы баайы туһаныыга кафедратын доцена, информатика уонна математика институутун суоттуур технологияларга кафедратын чинчийээччи доцена Александр Колесов бырайыагын соругунан суоттуур ньыма саҥа көдьүүстээх бэрээдэгин уонна бырагырааматын хааччыыйыыны толуйуу буоларын ыйда. Научнай үлэтин түмүгүнэн ниэп уонна гаас баайдаах сири чинчийэр бырагырааманы оҥоруу буолар диэн этиллэр.

Үһүс граны ХИФУ наукаҕа уонна инновацияҕа департаменын дириэктэрэ Нинель Малышева ылла. Кини бу үбү «Саха сирин айылҕатын лексикатын бүттүүннүүтүн чинчийии: этимология, лингвогеография уонна лингвокультурология» диэн научнай-чинчийэр бырайыак олохтооһунугар ыытыаҕа.